حوادث السير من طرف مجهول
شحال من واحد كايكون غادي فطريق وكضربو طوموبيل وكتهرب وكنقولو مسكين مشات على عينو ضبابة، يكمدها ويسكت.
لا أسيدي هد لهضرة مكايناش حيت كاين واحد الصندوق خاص بحوادت السير لي مرتكبها شي واحد مجهول أو معندوش لاصورانص.
هد الصندوق سميتو صندوق ضمان حوادت السير. وكيعوض فقط على الاضرار لي وقعات فلجسم ديال الانسان ماشي فالسيارة او الدراجة وغيرها. كنعاودها الأضرار لي كتوقع فالجسد ديال الضحية.
وبالتالي الله يرحم الوالدين لي كيعرف شي واحد ضرباتو سيارة أو دراجة نارية وغيرها وهربات ووقع لي ضرر فالجسم ديالو يقول ليه ماتخافش و يبين ليه أش يدير:
أولا: ياخد نسخة من محضر الحادثة من عند البوليس أو الجدارميا لي قيدو كوسطا.
ثانيا : يكتب طلب ديال التعويض عن الضرر لي حصل لو ويبين فيه كاع لفلوس لي خسر.
ثالثا: يرسل هد الوثائق كاملة فملف واحد بواسطة البريد المضمون ( روكوموندي) لهد العنوان : صندوق ضمان حوادث السير زنقة اسلي رقم 4 الدار البيضاء.
ومن بعد مايتوصل الصندوق بالرسالة ديال المعني بالامر غادي يعيطو ليه باش يتفاهمو معاه.
وواحد لقضية مهمة، هادشي خاصو يدار داخل أجل 6 أشهر من تاريخ وقوع الحادثة والى فات هذ الاجال ومكانش شي عذر مقبول، ديك ساعة نقولو ايييه مشات على عينو ضبابة.
ونزيد الى ماتفاهمش الضحية مع الصندوق عندو لحق يرفع دعوى ضدو فالمحكمة الابتدائية.
هذ المعلومات كنحاولو نتقاسموها معاكم فماتنساوش تقاسموها مع الناس باش تعم الفائدة.
المنشور المقبل نهضرو على الشخص لي ضربتو طوموبيل وماعندهاش لاصورانص.
المشاركات
ليست هناك تعليقات:
إرسال تعليق