اشنو هي كونطرا آنابيك !
لي ماكيعرفش الانابيك هي واحد المؤسسة عمومية عندها استقلال مالي وتحت تأطير وزارة الشغل والهدف والدور ديالها هو إنعاش التشغيل.. هاد الآنابيك كتلعب دور الوساطة بين المشغل وبين الشخص لي باغي يخدم..
كولشي كيعرف أنه كاينين كونطرات فالعمل.. ولي هما:
CDD:
ولي هو عقد محدود المدة.. مثلا ملي كيبغي يخدمك كيقولك را غانديرو فالكونطرا غير خمس شهور مثلا وملي تكمل عاد غادي نعاودو نجددوها.. وكيكونو فيها بزاف ديال الالتزامات بالنسبة للمشغل.. ولي منها
CNSS - ASR - CPS
CNSS: هي الصندوق الوطني للضمان الاجتماعي.
ASR: لاصورونص
CPS: التعويضات
.
CDI:
ولي هي كونطرا أو عقد غير محدود المدة.. يعني ملي كيديرو معاك المشغل ماكيحددش المدة لي غاتسالي فيها الكونطرا.. وكيكونو فيه الترامات بحال لاخور .. غا هو ماكيتفرق غا بالمحكمة.. يعني عقد مريكل نيت..
.
CATD:
وهذا عقد ديال إنجاز شي مهمة.. كيتحدد فيه الوقت والمكان ونوعية العمل.. وفيه حتى هو التزامات مفروضة على المشغل ومنها داكشي لي ذكرنا الفوق نيت.
.
.
هادشي كامل زوين وفصالح العامل يعني نتا ملي كتبغي تخدم هادشي فالصالح ديالك..
آرى اسيدي هادشي مابقاش عاجب صحاب الكروش الكبار لي شادين كاع البروجيات الكبار فالمغرب حيت طبعا كيكلفهم بزاف ديال الفلوس باش يخلصو كاع دوك الالتزامات..
ناضو اسيدي وبما أنهم هما المسؤولون فالحكومة وهما لي كيديرو القوانين.. خرجو لينا هاد الآنابيك.. لي هي عبارة عن أكبر قالب هزوه الشباب.. ولي كيقولك بلي نتا ملي غاتاخذ الديبلوم ديالك وتخرج تخدم.. راك ماشي موظف ولا أجير.. بل نتا غير مجرد سطاجير.. غير هو سطاجير وكتخلص والخلصة كتبدا من 1600 حتى ل 6000 درهم.
وهاد الكونطرا نعاماس كتلغي ليك ديك
CNSS - ASR - CPS
وكيجيبو ليك واحد اللعيبة جديدة ولي هي:
AMO( Assurance maladie obligatoire)
ولي كتعني التغطية الصحية الاجبارية.. زائد كتعفى من الضريبة على الدخل ههههه بحالا زعما كيخلصوك ب 4000 درهم
والشركة لي دخلتي ليها كتعفى من داكشي لاخور لأنها ماكتبقاش تخلصو عليك طبعا.. زائد كتعفى حتى من الضريبة المهنية..
.
هاد الكونطرا ديال الانابيك الى خدمتي بيها مع شي شركة لمدة كتقل على 6 شهور وخرجتي.. فراك كتعاود تستافد منها مرة اخرى الى بغيتي تخدم مع شركة اخرى.. أما الى بقيتي خدام معاهم اكثر من 6 اشهر وخرجتي فراه هزك الما ماغاتعاودش تخدم بيها مرة اخرى.. وغايخصك لي يخدمك بكونطرا من دوك الانواع لي دكرنا الفوق.. وطبعا حتى واحد ماغايبغي يخدمك نيشان بدوك الكونطرات ومايستافدش من كونطرا انابيك..
.
وغالبا المشغل لي كيخدمك بهاد الكونطرا كيقولك سنيها وكيدير فيها عاامين.. اييه عاامين غاتبقى غير مجرد سطاجير كيحرث عليك وكيدخل على ظهرك اللعاقة.. وحتى تكمل ديك عامين عاد كيدير معاك كونطرا من دوك الكونطرات لي ذكرنا الفوق..
ولكن !
راك وخا درتي معاه كونطرا انابيك عامين يقدر يجري عليك فأي لحظة.. حيت فالقانون الدولة كتفرض على المشغل يخدم 60% من الناس لي كانو خدامين معاه بكونطرا آنابيك.. و 40% الباب الاحباب.. يعني احتمال كبير تكون من بين دوك 40% ووخا كاع ماتكونش من ديك 40% غايلقاو ليك شي سبة ويجريو عليك ويعاودو يديرو نفس البلان.. وهاكا الشركة ديالهم كتبقى تستافد من الانابيك وكتحرث على الشباب وتستغلهم..
داكشي علاش معظم الشباب كيبعدو من القطاع الخاص وكيبغيو يمشيو للقطاع العام..
لمهم هادشي كامل قلناه غا باش تستافد وتعرف شنو كاين. حيت هادشي ماكيقولوهش ليك
المشاركات
ليست هناك تعليقات:
إرسال تعليق