بعض أنواع التأمينات (لاسيرونس)..
كانت عندك سيارة ضروري بطبيعة الحال من لاسيرونص..
لا سيرونص فيه 3 الأنواع كبار :
1 تأمين الحماية المدنية : هدا هو الرخيص فيهم وكتأمن على جوج حوايج :
أ : لا كنتي ماشي فوتيف يعني ضربك واحد من اللور...ولا ضربك واحد حارق فوروج ولا عندو سطوب ولا كان على ليسر ديالك ... فهاد الحالة بهاد لاصيرونص العادية كتعوضك على الخسائر المادية لي لحقات بالسيارة..
ب : في حالة كانو خسائر بشرية ( يعني تجرحتي ولا تقصحتي ولا تهرستي ولا متي ولا مات شي واحد راكب معاك ) لاسيرونص كتعوضك حسب درجة الخطورة والتعويض هنا كيكون بالملايين )..
الفرق فقط في المدة ديال التعويض والاجراءات :
مثلا فحالة كانو خسائر مادية عند الطرفين لي تسببو فالحادث، كيجي الكونسطاطور ديال لاسيرونص كيعمر ليكم كوسطا وكتمشي تدفعها لاسيرونص ديالك وكيقيمو لك الخسائر وحتى هما كيحطوك فشي 2 الإختيارات :
الاختيار الاول : اتعطيهم الطوموبيل يدخلوها للكاراج ديال لاسيرونص حتى تصاوب وترجع تجيبها ( وفهاد الحالة على بارشوك تقدر تبقى تسنى شهر )..
الإختيار الثاني : كتمشي تصايبها لراسك وتخسر فلوس من جيبك ومن بعد كتجيب ليهم الفاكتورة Facture وكيعوضوك على شحال خسرتي..
وهنا كيكونو القوالب بحيث نتا الخسائر كاملة كيكونو ايطلعو عليك ب 2000 درهم وكتعطيهم Devis فيه 14000 درهم باش تصلح، وهما كيعاودو يديرو حسابهم وكيعطيوك فاللخر مثلا 9000 درهم، وكيشيط لك الصرف وهادشي كياخد من 15 يوم حتى لشهر ولا كثر حسب السرعة ديالك فالإصلاح والإدلاء بالفاكتورة والدوفي..
نكملو أنواع التأمينات دابا :
2 : التأمين ديال Damage et collision وهدا كيعني أن لاسيرونص غتعوضك إلى كنتي فوتيف ولا ماشي فوتيف، الفرق فقط فأنك إلى كنتي فوتيف غتخلص 20٪ من الثمن لي خالصتي عليه لاسيرونص النهار الأول ( يعني لا قطعتيه لاسيرونص ب 5000 درهم ودرتي حادثة من بعد ونتا فوتيف غيزيدو عليك 1000 درهم ديال البيناليتي وهادشي كينطابق حتى على لاسيرونص الأَولى لي هضرنا عليها الفوق.. اما إلى كنتي ماشي فوتيف مكتخلص تا حاجة)..
3. : تو ريسك tous risques وهي لي مزيانة ولكن غالية ( زيد الما زيد الدقيق ) هي انك ملي كتكون فوتيف ولا ماشي فوتيف غادي تتعوض على الخسائر كاملة..
غتقولو لي شنو الفرق بينها وبين التأمين رقم 2؟
الفرق هو أنك تقدر تنعس فالليل و فالصباح تلقى الطوموبيل مضروبة... هنا مكتحتاجش تلقى الطرف لي ضربك ، كتديها لاسيرونص كيعوضوك على الضربة.. عكس ديال Damage لي كيخص ضروري الطرف الثاني باش تتعوض..
فهاد الانواع كاملين كتقدر تزيد des options مثلا اتقطع العادية رقم 1 وتزيد التأمين على الزاج إلى لقيتي شي مجهول هرسو ولا على الحريق ولا على السرقة وهاد لي زوبسبون زيد الما زيد الدقيق كلما زدتي حاجة كتخلص عليها اكثر..
نصائح عامة :
1- دير أخويا كاميرا فالطوموبيل كتحميك من دوك الناس لي كيسمسرو فالتأمينات..
2- ضربتي شي واحد ونتا فوتيف ضرب حسابك ... شوف الضربة لي عندو لا كان يقبل تتفاهم معاه بشي ثمن لي قل من داكشي لي غتزيد عليك لاسيرونص وقدي معاه...
مثلا نتا كتخلص 5000 درهم اتزيد عليك لاسيرونص 1000 درهم وهو عندو غير قمشة خاصها شي 400 درهم ... إذن عطيها ليه ودوز حيد حسن من ألف درهم ...
هادشي لا كانت عندك أسيرونص عادية ... أما لا كانت عندك Damage ولا tout risque قيد معاه وزيد قاد لراسك الضربة فالطوموبيل باش حتى نتا تتعوض..
3. ضربتي شي واحد وتقصح ولا شي حاجة ... وبان لك بلي كيمثل حاول تسلك معاه على أساس تديرو كوسطا عادية ... حيت لا بقا كيمثل عليك اتضطر تعيط البوليس هما لي يديرو الكوسطا وفهاد الحالة كياخدو لك الوراق ديال الطوموبيل وكتبقى مجرجر وهو وهاداك لي غير كيمثل ...
ولكن لا بان لك بلي بصح يقدر يكون تقصح ديرو خوك ولا باك ومتغمقش عليه خليه يتعوض..
4 فاش تكون صايك ديما رد بالك مع صحاب الماطر أكثر... حيت المطور ديما إلى ضربتيه عول على أنه ايكونو عندو خسائر بدنية وغادي تتجرجر معاه ... وحتى مالين الماطر عارفين بهاد البلان داكشي فاش غير كتخلعو كينعس لك فالارض حيت عارفك مغتبغيش تتجرجر واتبدا تفكر تساويها معاه بالفلوس ... ولا تنازل لك دير عليه الشهود ولا دير معاه شي ورقة ديال التنازل حيت تقدر غير تمشي ويتنادم معاه الحال ويدير بيك شكاية بلي ضربتيه وهربتي وهادي فيها تجرجيرة ما يعلم بيها غير الله..
المشاركات
ليست هناك تعليقات:
إرسال تعليق