فاش كتبغي تشري شي دار يلاه فطور البناء و كتمشي عند مولاها باش تفاهم معاه وفنفس لوقت كتخاف لتشمت. اشنوهي الأمور لي خاصك ترد ليها لبال؟
أول حاجة، هي تشوف واش عندو رخصة لبناء هذ لقضية مهمة جدا حيت الى مكانتش لعقد الابتدائي ديال لبيع لي كديرو معاه كيكون باطل بقوة القانون.
ثاني حاجة، تشوف التصميم أو لبلان ديال الدار لي صايبو لمهندس واش نهائي أو لا، وهد لقضية كتعرفها بهد لعبارة" غير قابل للتغيير" لي كتكون مكتوبا فلبلان ولي كتخليك تعرف بان المنزل ديالك فلوراق هو لي غادي يكون فلواقع.
ثالث حاجة، هي دير معاه عقد البيع الإبتدائي عند نوطير ( موثق) أو عدول أو محامي ولكن ماشي أي محامي، خاص يكون محامي لي عندو لحق يترافع فمحكمة النقض.
هد عقد البيع الابتدائي كتكون فيه مجموعة من المعلومات الضرورية منها لهوية ديال البائع والمشتري ورقم الرسم العقاري ورقم وتاريخ رخصة البناء وتمن البيع وفلوس التسبيق وتاريخ تسليم المنزل + الضمانة لي تخليك ترجع فلوسك فحالة ما البائع مكملش خدمتو.
وخاصك تعرف واحد لقضية مهمة أن فلوس تسبيق لي خاصك تدفعها فاش كديرو عقد االبيع الابتدائي مكتفوتش 10 فالمائة من الثمن الاجمالي ديال المنزل وكيتحطو فواحد الحساب باسم البائع وماعندوش الحق يتصرف فيهم إلا من بعد مايوصل لوقت ديالهم ومن بعد مايجيب الضمانة على كل تسبيق.
من بعد هادشي، كتدير مع البائع دفتر التحملات لي فيه الواحبات ديال كل واحد: البائع خاصو يلتزم بنوعية الخدمة لي تافقتو عليها والأجال ديال التسليم. و الشاري خاصو يدفع 60 فالمائة ديال لفلوس مفرقا على 3 ديال المراحل 20 فالمائة ف20 فالمائة ف20 فالمائةمن ثمن المنزل.
ونزيدك، نوطير لي كتب ليكم العقد الابتدائي معندوش لحق يخلي البائع يتصرف ففلوس تسبيق إلا من بعد مايجيب الضمانة على كل تسبيق بغا يخدم بيه.
ونصحك واحد النصيحة هو فاش تسبق 50 فالمائة من ثمن المنزل تهز عقد البيع الابتدائي + روسي باش دفعتي تسبيق وتمشي لمحافظة ودير طلب التقييد الاحتياطي للمنزل. هاد التقييد الاحتياطي كيمنع على المحافظ يعطي للبائع الرسم العقاري ديال المنزل وبالتالي كتكون محمي مزيان من أي تخلويض. وماتنساش هد التقييد الاحتياطي كيكون صالح حتى يوصل وقت ابرام عقد لبيع النهائي.
غادي تسولني إمتا غادي يكون هاد عقد البيع النهائي؟
غادي نجاوبك ونقول ليك هذ لعقد كيدار من بعد مايحصل البائع على شهادة السكنى أو شهادة المطابقة مسلمة من عند لمهندس لمعماري وكيتصل بيك داخل أجل 60 يوم باش تكمل لفلوس لي بقات ليك وتكتبو لعقد النهائي وتاخد سوارت ديال الدار ديالك.
وفحالة الى مابغاش البائع يكتب معاك عقد لبيع النهائي عندك الحق ف 2 لحوايج :
1* إما تفسخ عقد البيع بقوة القانون وتحصل على فلوس التسبيق من الضمانة لي هضرنا عليها فلول زائد التعويض
2* أو إما دير دعوى فالمحكمة من أجل اتمام البيع والحق فالتعويض. والحكم لي كتحكم ليك بيه المحكمة هو بمتابة عقد البيع كيسمح ليك تكمل الإجراءات فالمحافظة وتكتب الدار بسميتك.
المشاركات
ليست هناك تعليقات:
إرسال تعليق