كيفما كيعرف الجميع أن كل واحد عندو لحق يختار المحامي لي كيعجبو أو يبدل محامي بمحامي آخر أو يكمل الدعوى بنفسو إيلا كان نوع القضية مكيفرضش بالضرورة يكون محامي.
هادشي مزيان وكيضمنو القانون. ولكن رد بالك لواحد لمسألة مهمة ومهمة بزاااف وهي فاش كيكون سبق ليك شدتي محامي ومن بعد كتبغي تكمل الدعوى بنفسك بدون هد المحامي.
لي خاصك تعرف بأن المحامي فاش كيشد الدعوى من عندك كيدير لمقر ديال المكتب ديالو هو العنوان لي كيتوصل فيه بجميع المراسلات والوثائق لي كتهم القضية ديالك من المحكمة.
ونت فاش كتبدل المحامي وكتاخد من عندو لملف ديالك على أساس أنك تكمل الدعوى بنفسك مكتمشيش لكتابة الضبط باش تعطيهم لعنوان الجديد ديالك وبالتالي مكتوصلش بكل ماهو مستجد لي كيخص القضية ديالك وهكذا كتكون عرضتي حقوقك لخطر.
غادي تسولي علاش؟؟؟
غادي نقول ليك حيت أي أمر كيهم لقضية ديالك سواء اجراء خبرة أو دفع طلب او تحديد تاريخ الجلسة او اي اجراء أخر كترسلو لمحكمة لعنوان لي عندها يعني لعنوان ديال المكتب ديال المحامي لي كنت شاد ولي يقدر هد الأخير مايعيطش ليك نهائيا باش تجي تاخد هد الوثائق لأن علاقتك بييه انتهت.
وبالتالي كتضيع عليك بززاف ديال لفرص باش دافع على حقوقك وأكثر من هذا يمكن تحدد لجلسة ويصدر لحكم ونت مافخبارك والو وتلقى فالاخير حقوقك ضاعت وتبدا تجري هنا وهناك ولكن فات الاجال لاقدر الله.
لهذا ، عقل على هذ لقضية مزيان ودكر بها صحابك وعائلتك: أي واحد قرر يكمل الدعوى بوحدو بعد ماكان شاد محامي، أول حاجة يديرها هي يمشي عند كاتب الضبط ديال المحكمة لي فيها الدعوى ويعطيه العنوان جديد ديالو باش يمكن ليه يتوصل بكل مستجد كيهم القضية ديالو ويتبعها خطوة بخطوة وبالتالي يدافع على حقوقو ويحيد عليه المسؤولية.
المشاركات
ليست هناك تعليقات:
إرسال تعليق