اليوم غانتكلم ليكم على المفوض القضائي :
المفوض القضائي يمكن ليه يسهل عليكم تأمين حقوقكم ، المفوض القضائي راه هو وذنين وعينين المحكمة ، علاش : حينت لي شافها ولي سمعها كايديرها فالمحضر ، والمحاضر دياولو عندها قوة قانونية كبيرة لي يمكن ليها تغير بزاف ديال القضايا فالمحاكم ، والقضاة كايعتامدو عليها.
مثلا: تعاقدتو مع شي شخص باش يدير ليكم شي خدمة قبل نهاية شهر يوليوز ، وحتى يكمل ديك الخدمة عاد يمكن لكم تخلصوه ، وإلى ماكملش الخدمة قبل الشهر لي تافقتو عليه ، اشمن دليل مادي غادي يكون عندكم باش تبتو ديك الحالة ، هنا يمكن لكم تتاصلو بمفوض قضائي وطلبو منو أنه يدير ليكم معاينة بلي هاديك الخدمة ماكملاتش فهداك التاريخ لي تافقتو عليه ، ويمكن ليكم تستعملو المحضر ديال المفوض القضائي باش تبتو المسؤولية ديال هداك الشخص لي ماوفاش بالإلتزام ديالو .
اولا مثلا : خصكم ضروري تبلغو واحد الرسالة لشي شخص او شركة ولكن هاد الاخير ديما كايرفض يتسلم ديك الرسالة وماعندكم تاشي حجة عليها ، هنا عاوثاني يمكن لكم طلبو مفوض قضائي انه يبلغ هاديك الرسالة ، وديك الساعة الى هداك الشخص رفض تسليم الرسالة من عند المفوض ، هو لي غادي يكون مسؤول على داك الرفض ، ونتوما غادي تعتابرو بلغتو الرسالة .
او راه يمكن للمحكمة تاهي تعين مفوض قضائي ، مثلا المحكمة صدرات شي حكم أن الممتلكات خصها تحجز ، هنا غايدخل الدور ديال المفوض القضائي لي هو التبليغ ويقوم بالتنفيد ، يعني هو لي غادي يحجز على الممتلكات بناءا على الحكم.
وللإشارة المهنة ديال المفوض القضائي هي مهنة حرة ، ولكن راه أدى القسم يعني محلف ، والأتعاب ديالو على حسب : الى كان خرج يدير معاينة من طلب شي شخص ، راه داك الشخص لي غادي يخلصو ، أما الى كانت المحكمة هي لي عيناتو فالسيد لي رابح القضية هو لي غادي يخلصو.
المشاركات
ليست هناك تعليقات:
إرسال تعليق