نصائح و ارشادات عامة عن طريقة البيع بالوكالة
إلى عجباتك شي سيارة مليحة، نقية ،مخلصا الضرائب لي عليها و مكاين عليها حتى تعرض.
مزيان......!!!!!!!!!!!!!!!!!!!!!!
ولكن نهار كتبغي تفاهم مع مولاها كتلقاه عندو وكالة...
فهاد اللحظة كتبدا تخاف وكتقول: عنداك نتصيد أو يوقع لي شي موشكيل من بعد.
أسيدي ماتخاف مادهش اليوم إن شاء الله نشرحو ليك أشنو هي الأمور لي خاصك تنتابه ليها :
1● قرا لوكالة مزيان وتأكد من صحة لمعلومات لي فيها، وخاصة لي كتعلق بسيارة لي بغيتي تشري وبالسيد لي غادي يبيع ليك.
2● شوف التاريخ لي دارت فيه لوكالة، وحسب لمدة ديالها حيت إييلا فاتت 3 أشهر قول صاحب لوكالة يدير ليك التزام égalisé بأنه هو لي كان مسؤوول على السيارة طيلة هد لمدة يعني إلى غاية نهار لي غادي تكاتب معاه فيه. وخلي عندك هد الالتزام راه تقدر تحتاجو من بعد.
3● نهار تبغي تخلص واجبات التسجيل ديال السيارة راه غادي تخلص كذلك على لوكالة 240 درهم إيلا كانت المدة ديالها قل شهر، و 440 درهم إيلا كانت فايت شهر وبالتالي حاول تنقص ليه هد لمصاريف من ثمن سيارة.
ومتنساس واحد لقضية ضروري ومهمة وهي: إيلا كانت سيارة مخرجها مولاها كريدي خاصك تطلب من عند مول لوكالة يعطيك شهادة رفع ليد من عند لبنكا لي مخلصا لكريدي. حيت إيلا ماكانتش راه غادي يرفضو ليك دوسي نهار تبغي تحول لكارط كرييز بسميتك. وديك ساعة تبدا تقلب على مول لوكالة لي خاصو يمشي يجيبها من عند مول طوموبيل لي مخرجها كريدي.
غادي تسولني وتقول ليا وكيفاش غادي نعرف بأن السيارة خارجا كريدي؟؟؟؟؟؟؟
غادي نجاوبك ونقول ليك قرا لكارط كرييز مزيان وإييلا لقتي مكتوب فيها عبارة: "بيع بالمصارفة" فراه مخرجها مولاها كريدي. وبالتالي ضرورري هد الشهادة سواء شريتي سيارة بالوكالة أو مباشرة من عند مولاها.
ونزيدك: هد الوثائق كاملين + عقد لبيع لي غادي ديرو فلمقاطعة ولافيزيت ديال لبيع وروسي باش خلصتي لخيل وواجبات التسجيل وأي وثيقة أخرى دير ليهم فطوكوبي وخليهم عندك راه لضرورة.
وفالاخير، لبيع بالوكالة راه ماصعيبش خاصك غير تردو لبال لهد الامور لي ضروري تعرفوها.
المشاركات
ليست هناك تعليقات:
إرسال تعليق